Lékrivër, rakontër zistoir, Daniel Honoré la énèt le 16 oktob 1939 Sin Benoi. Son famiy i sort Lafrik é Madégaskar koté son momon é la Shine koté son papa : batarsité-la minm la dõne alï in kisalité linèstimab.
Daniel Honoré lété lamontrër an lèt é langlé Sin Benoi. Dabor militan politik, aprésa militan la lang kréol, lï la trouv konblaž èk lékritïr é lï la osi mèt ansanm zémision radio é travay Lofis La Lang. Ankor žordi lï fé tout sak lï guingñ fé pou pouss la lang kréol.
Kan lï la kal son lokïpasion politik Daniel Honoré la mèt ansanm le mouvman Axel Gauvin, Boris Gamaleya, Gilbert Pounia. . . lavé anbéké dan la fin zané 1970. Lï la sïrtou ékri bann louvraž an kréol é, koté lékritïr, lï la anpar bann zëd’mo, provèrb, zistoir. . . pou lèv an lièv tout sak i fé la rishès le patrimoine kïltïrèl popïlèr rényoné. Astër Daniel Honoré lé rakontër zistoir é, ansanm Anny Grondin é Sully Andoche, lï travay pou la transmision zistoir dan le réspé léritaž lë zansèt. Zot troi i roganiz léstaž zistoir é Daniel Honoré i insis sï la kréolizasion zistoir èk lanvironman rényoné.
I guingñ di Daniel Honoré lé in zarboutan la kïltïr La Rényon.
Bibliografi Daniel Honoré
Mon île, Les Chemins de la Liberté, Saint-Denis, 1979
Tiflère la misère, Les Chemins de la Liberté, Saint-Denis, 1980
Louis Rédona, Les Chemins de la Liberté, Saint-Denis, 1980
Le Comore, ASPRED, Saint-Denis, 1982
Cemin Bracanot’, UDIR/ASPRED, Saint-Denis, 1984
Marcéline Doub-kèr, UDIR, Saint-Denis, 1988
Gramoun la di, UDIR, Saint-Denis, 1990
Lo Maloyèr blan, UDIR, Saint-Denis, 1991
Proverbes réunionnais, Page Libre, Saint-Denis, 1992
Ma Chine Nation, Ader, Saint Denis, 1994
Kroyans, UDIR, Saint-Denis, 1995
Pierre et Zizime, CCAS, Saint-Denis, 1996
Légendes créoles (Tome 1 é 2), UDIR, Saint-Denis, 1997
Légendes chinoises, UDIR, Saint-Denis, 2000
Dictionnaire d’expressions créoles, UDIR, Saint-Denis, 2002
Devinettes créoles, UDIR, Saint-Denis, 2003
Contes créoles (èk in tradïksion an fransé Jean-François Samlong), UDIR, Saint-Denis, 2003
Vativien, Éditions K’A, Ille-sur-Têt, 2006
Shemin brakanot, Éditions K’A, Ille-sur-Têt, 2008 (rédision Cemin Brakanot’, nouvelle graphie)
Faisons nos… contes, Éditions K’A, Ille-sur-Têt, 2009
