Le Maloya Kabare

Sortie en 2005

mercredi 17 septembre 2008, par Eric Naminzo

In valab lomaz pou in not gran poto pou maloya : Granmoun Bébé. La Rényon la pa tro koni ali, mé stin boug la tyinbo for tradisyon kabar maloya, sèrvis kabaré , sèrvis malgas. Domoun té koné ali pou sa osi : té aminn byin bann sèrvis -la, parlfèt, li té prèt malgas... laba dann fon Sinlwi, "Balans Koko".Li té diskré, in pé mwin popilèr ke bann Granmoun Baba, son vwazin, in not bèl poto zarboutan tradisyon sèrvis kabaré.

Souvandéfwa , navé kabar son kaz, parèy sak la kaz Granmoun Baba... Bann zartis zordi la fine konfirmé dann santyé maloya (konm Danyèl Waro, Gilbert Pounia, ...), té anparmi, la bwar son gayar. In lomaz té falé fé, in valab travay ramas bann shanté Gramoun Bébé si in lazèr.

Parapor lo ritm, lo roulman sèrvis kabaré lé an binèr, i tourn, i ronn, santèr i grèn in romans i tourn in pé an vals éropéin osi... La i di ou "plèr out maloya" ; fo war osi dann trimo-la linfliyans indyin. Aprésa, kan roulèr i "kas", la i anvoy dézyèm ritm, an maloya tèrnèr, tipik, sat nou koné plis. La wi pé dansé, lo kèr i sant for, na lanbyans la zwa !
Maloya konplint, maloya la trans, maloya lo kri lazwa vidésanm..

Artik an fransé si li / article en français sur lui : Temoignages.re

Granmoun Bébé la fine alé. Li la swiv lézot granmoun maloyèr : apré bann Gramoun Lélé, Lo Rwa Kaf, ek Granmoun Baba, son tour, li la désot la vi lo 22 févriyé 2005, apré in lospitalizasyon.
Konm di in dalon, "zot la parti fé kabar dann zétwal", la pa di pèrsone ryin, konmsa, an misouk, rant granmoun, rant dalon...

(Sak la anvi lir ti lartik an kréol si la disparisyon inndéryèrlot de nout granmoun maloya, zarboutan nout kiltir, ala in gatir : http://www.temoignages.re)