Domin in not soley

Apré in zafèr konm trant’ lané li pasé pou chanté, zamé li lavé anregis’ son bann sanson ! Astèr lé paré, Franswa Sintomèr la largé, li la krazé, li la pilé son maloya anndan son CD. Konm zot i koné, son maloya lé pa in kozé pou fé ri, ousinonsa pou fé dans’ touris’ si plaz koté Boucan... Non. Maloya-la lé fé pou fé pèt la têt, pou fé vib lo kor, pou fé lèv la pousièr’ ! Mé osi, li lé la pou fé chof koko, pou fé réfléchi la têt... nou té koné, mé Franswa Sintomèr i rapèl a nou parézanp’ : bwar pa tro, a koz "la pa la rak i fé in bonom" ! Alé, anvoyé ! N’a suiv’ out kozé !