In konfésion zanfan le monn

Moin osi lé DOMien. Kan moin lété ti fiy in žour 1962 le gouvèrnman la Frans la obliž amoin kit mon kartié tèrlaba akoz le kolonizasion lété fini, i la mèt amoin dan in bato, i la anvoiy amoin an Frans, i la di moin lé in rapatrié. Sa la pa in shoi moin la fé. . . kan mi ansouvien mon zèntan mi pans le kaz mon granpèr granmèr èk tout lamour zot té i dõne amoin, épi sèk pou sèk, an kasé brizé, moin la artrouv amoin an Frans ansanm bann marmay lékol i moukat mon lèr d’voi barok, i di amoin propo rasis. . . pourtan rapatrié i vë dir i armèn amoin dan mon patri é sï mon kart didantité la ékri fransé ! Tilanp tilanp bann zané la pasé mé, žordi ankor, moin la toužour poin mon plass, pa plïs dan mon DOM lontan k’an Frans, kanminm moin lé fonksionèr léta fransé. . . in fonksionèr le pouvoir létatik la domann lané dèrnié in sèrtifika nasionalité pou renouvelé mon kart didantité. Kan moin la domann le sekrètèr d’méri akoz mon lak nésans Nantes lé plï valab konm dabitïd, lï la mèt amoin dëor é lï la di i sar dõne le kèstionèr renouvèlman mon kart sëlman kan moin sar dõne azot mon sèrtifika nasionalité : moin la pass in lané pou fé rëshèrsh dann zarshiv le « Ministère des Affaires Étrangères » avan guingñ sèrtifika-la akoz dëpi sink žénérasion tout mon bann famiy la poin énèt sï le téritoir fransé la métropol. . . pourtan moin lé in rapatrié zot lavé di an 1962 : i sanm zot la oubliy sa astër, konmsi narienk la Frans i mérit le non patri. Kosa in DOM ? Moin la énèt dan in DOM lé pï in DOM, la pass in bon koupdetan an Linn osi, mi koné plïziër kozé, la anbéké in lantant rényoné. Moin lé in zanfan le monn é zanfan le monn-la, sëlman žordi, i niabou ékri . . . an kréol rényoné . . . sak lï la žamé žamé žamé di sinonsa ékri an fransé. Bann mo la shap mon kër an kréol minm, domann pa koman moin la fé. . . kosa in rényoné, kosa in zorèy kan sakinn i panss dan lo minm kozé ?. . . sa lé pa in viktoir minm lo langaz kréol sa ?