André Robèr : entre peinture, écriture et édition

A koz ke nou la pa souvan lokazion antand kozé nout bann limazèr é fonnkozèr, i fo di in gran mèrsi l’ARCC : zot i donn souvan la parol a domoun na de soz pou di. Lé parézamp lo ka so CD. Anndan, Dominique Jeantet i kraz in kozé èk André Robèr pou retras son parkour depui lu la kit La Réunion pou nir instal a li si lo kontinan, koté Marseille é koté Paris. Duran 1h30, zot i pe antand Robèr, André rakont son vi, rakont son rapor a lar, son rapor a nout langaz, etc. Li ésplik koman li la fé pou devnir limazèr, fonnkozèr, é fagotèr liv péi.

Lo zom, konm son parkour, lé atipik : lu la kit la Plaine kan li té zoumine, pou nir fé zétud é travay an France... depui, lu la déside angage a lu, é lu la komans fé in gro produksion lartistik. Antann a li i pèrmète zèt in regar diféran si son travay, i pèrmète de konprann a li in méyèr fason.

I fo ankor azout ke anndan lo CD la rankont André èk Dominique, zot nora lokazion antann dé-traw zartik ékri par Stéphane Hoarau, èk dé-trwa fonnkèr lé lu èk la muzik par Deaf (Lansly).

Lé dos, ékout so CD i donn a nou linprésion André Robèr i prann a nou par la min pou fé in lalé-retour... Ant lo kontinan é lile, lé in not kalité regar si nout sosiété.