Péters, Alain

Alin, in moun inik.
In mizisyin navé in talan imans, in gran pasyon pou la mizik, li té sirtou in konpozitèr zéni, in fonnkézèr konm ou trouvra pa bonpé ! Dann son vinn, galé volkan té koul ansanm ronm aranzé... Son bann fonnkèr té mandaré sanm la révolt, rakokiyé dann fon in gran tristès, é, anminmtan, dann in gran vane la dousèr. Kisa noré konpri in boug i bwar toultan ?
Li la éséyé pourtan, la tas manir larg boutèy la... Mé traka la vi, in labitid i kol si ou ou giny pi fé ryin, la ansèv ral ali pli lwink’baro lavi.

Alin lé mor an shyin dann shemin. Wi, mi di pa sa in sèk-sèk, mé la pa pou
Ou pé mèt in voyaz létikèt si la tonm Alin : robèl, artis (mizisyin – poèt)… ou sansa linkarnasyon lotodèstriksyon.

Li té zis in boug misoukant, sekré, absoliman parèy la natir son péi, èk son bann foré vyèrz, natir sovaz, malizé.

Kan Alin la giny trézan, li la komans zwé in pé la mizik dann lorkès Jules Arlanda.

Son papa, kinm li té mizisyin minm (batri, la flit), la tord la boush, té kontant pa li pasyon son garson : Alin té zwé gitar an longèr d-zourné, té akout ryink Brel, Brassens, Hendrix, bann Beatles… Parlfèt, la pa tardé pou shyé èk lékol.

Péryod rok la mark son vré komansman dann somin karyèr la mizik : èk son sové té ki tonm si zépol, ek son pantalon patdèf, lo zinnzan la arpran tout bann standar Led Zeppelin. Manmzèl téi yinm ali , vèy pa koman !

Kan M. Chan Kam Shu I roashté lo sinéma Royal (Sinzozèf), é ke li instal bann stidyo répétisyon dan lo bann sousol anndan-la, lé ga la débark an poundyak, ek René Lacaille, anparmi navé Alin Peters èk son group dalon, Joël Gonthier, Bernard Brancard, Hervé Imare, ek Loy Erlich.

Lété in lokazyon défoul an bèf la mizik, mé pa pousa ke navé pwin bon kréasyon mizikal !

Zistorézon, té lo fonnman in mizik la énèt anndan, in mizik té mélanz maloya, séga sanm lo rok. Boudikont, la fénésans in group : « Caméléon ».

In zour, Jean Albany i vyin bat in karé war zot. La done nésans in prozé fé in kasèt, é té Alin la amèn sa. Sé la, par kasèt-la, Alin la pran konsyans kosa i lé ékrir la lang kréol.

Mé soman, li rant lad-dan èk lo minm lélan ke li plonz dan la rak.

Aprésa, lo lavantir sinéma Royal i èstop, traka la moné.

1978

, Alin i giny in baba, inn ti fiy. Lane answit, in not baba I énèt : lo group “Caroussel”.

Néna : Alin (bas + shan), Joël Gonthier (pèrkisyon), jean-claude viadère (vwa, kayanm) Bruno Leflanchec (tronpèt), Loy Erlich (klavyé). Group-la, ryink zordi nou consider ali pou son valèr : in lanblèm, in gran group ! Afèr ? Saspé li té tro an avans, tro nèv, somanké, tro boubou osi… Déza, an 1980, papa Alin I désot la vi, akozsa li arkomans bwar in ta.

Li bwar sitantèlman ke bann ga lo group i kit sanm li, ziska son fanm i sov loumay.

Pèrsone I giny pa artrap ali dan son tonbé , dan son bèzman lalkol (ni Danyèl Waro, ni Zoun, ni Marco Polot, ni Loy). Aprésa, in lamontrèr pasyoné par la mizik i apèl Jean Marie Pirot i fé Alin in propozisyon : anrozis son bann santé si manyétofone 4 pist. Inn an la fé sa. Gran matin li té ariv lakaz Alin, mé té malizé, porézon Alin té sava la boutik in moman doné, té arvyin pa romé, pi moyin fé ryin, okid mizik ! arpas lannmin !

Lo tit lo kasèt sé « Romans pou in zézèr » sanm in livré 60 paz (mangé pou le cœur »)

Alin i bwar minm, lé plizanpli fay, malad … li sa an Frans an 87 pou fé in kir dézintoksikasyon. Son dalon Loy, la èd ali in pé anrozis détrwa morso.

An novanm 94, Caroussel i arviv , zis pou 2 konsèr èkspésyonèl ! domoun, pilblik té sitèlman kontan war Alin la armont si la sène !... domoun la lévé pou bat la min pou li, pou rann ali omaz. Tèlman gadyanm Alin, i désid arèt bwar.soman lé fine tro tar… li mor èk in kriz kardyak dann somin, lo 12 zilyé 1995.

Zordi, tout lé dakor pou di sé in moniman, sé ryink zordi nou rokoné son valèr, son talan, son zéni, son malèr, son doulèr osi…

Mé nou oubli pa li, nou oubli pi li. Li fé parti astèr bann poto pou nout mizik, nout patrimwane kiltirèl, nout rasine.

Na shant ankor « Rès la maloya », so zoli romans !Sé in limn maloya pou La Rényon, in standar alèrdzordi.