Une Île toute en auteurs : 100 textes sur La Réunion

Ek sonm rakonté, romansaz, fonnkèr é parolaz, lo lantologi i vé présant lil La Réunion in not fason. Li saroy lo léktèr si tout kalité somin, li pass an révizion kat sièk listwar, dopi 1613 ziska zordi. Anndan ou artrouv san tèks la été ékri par in takon domoun la koni La Rénion dan zot vi. La risès lo liv lé ké lo swa lo bann tèks lé varié : na zékrivin la France (L’abbé Prévost, Charles Baudelaire, George Sand, etc.), na zékrivin La Réunion (Evariste de Parny, Auguste Lacaussade, Leconte de Lisle, èk osi Jean Albany, Alain Lorraine, Anne Cheynet), mé na osi bann tèks politisien ou zom la rolizion la viv si lil ou la ni zis pass in tan (Raymond Barre, Paul Vergès, Gilbert Aubry, Charles de Gaulle, Jean-Paul II, etc.). Ek tout so moun la, fo ankor arzout Danyèl Waro, Axel Gauvin, Claude Nougaro, mé osi zékstré Le Code Noir, etc.

Zot lora konpri, lo liv i invit a lir in takon zistwar, in takon manièr war La Réunion… Anndan na tèks lé koni, mé na osi teks lé mwin koni. Arlir tousala lé in fason original dardékouv nout kiltir, a travèr bann regar péi ou bann regar i vien de déor. Ala in bon liv pou prann son tan, pou li ali ti pa ti pa…