Jalma, Christian

Avan komans koz lo fonnkèr Christian Jalma, i fo komans rakont lo listwar son non-gaté : « Pink-Floyd ». Christian Jalma la grandi koté Sainte-Clotilde, in semin té i apèl « ruelle des Anges ». A koté son kaz, navé in moun té i ékout toultan la mizik : in mizik étranz, té i sant pa an kréol, ni an fransé, mé té i sant an langlé… Pandan pluzièr lané, Christian la rod pou konèt kisa té i bèrs son tèt konm sa minm. E in zour, li la dékouv ke té lo group Pink Floyd. Té in révélasion pou li, é sé apartir so moman la li komans ékri. Li té vé rann sak navé dan son kèr, li té di son soufrans, mé pwin pèrson té i vé édit a li. Pandan vin tan li la gard sou lo koud son bann tèks, é li la minm sant a zot dan in group rok té i apèl « AOC », ziska ke Jean-François Reverzy la désid de publi a li ché Grand Océan : Le Pouvoir éphémère des lapsus (1997). La Vie s’acquit sous un pseudonyme, son dozièm rokèy fonnkèr, la vi lo zour an 1998.

Lo tit lo liv i ésprim bien la problématik lékritir Christian Jalma : « la vie s’acquit sous un pseudonyme » i di koman li la fé son non gras la révélasion la mizik Pink Floyd. Son lékritir i rès donk dan lo léspri lo group anglé : lé in kozé i délir, i mèt léfé, parèy in bonb i ésploz dann koko :

Pran in kilo sosiss’ pou lèr manzé
Ek in rom pou out papa
Dépèss ‘ a ou
Déor lo ven la lévé
Li sar amenn’ la pli
é
KOUR A OU

Le jeune homme lança le livre qu’il tenait
dans sa main,
sur le matelas du lit d’où il se lève
et
regarda, attentivement, comme pour se remémorer
le titre sur la couverture colorée
d’image et de mot « appelez nous la brise »
(p. 64)

Lo bann mo toulézour i mélanz èk bann konsidérasion si la vi, pou kréé in filozofi pèrsonèl. La struktir lo tèks i ésploz an lèr pou fé rotonm an ti mo morso zéspwar in péi la mizèr : « De mémoire joyeuse / Le miracle n’aura pas lieu » (p. 69). Mé la rankont, èl, na lié : kan i lir fonnkèr Jalma, i antann rézoné la mizik Pink Floyd. Lo bann mo lé pa an langlé, mé lo langaz, konm dan son « lexique du bichique », lé konm ki diré an langaz étranzé. Lo fransé konm lo kréol lé malmené, lé tiré dan in miz an paz atipik. Parfwa lo mo lé ékri an ti, parfwa li lé ékri an gro, é o milié tousala, na in lintèrzéksion ki vien apèl lo lèktèr pou fé rézone in son : ékri an gro, èk in takon variant, lo mo « oté » i vien bouskil la léktir.

Zordi Jalma i poursuiv son parkour èk in lintérogasion si limaz La Réunion : li partisip o Kino ke i pass dan lil, an propozan bann film i gard léspri son kozé. Ala son rénionité : lé né èk la rankont èk langlé, é i poursuiv èk le lantrechokage la lang, lo mo èk lo zimaz.

Liv Chrsitian Jalma

 Le Pouvoir éphémère des lapsus, La Réunion, Grand Océan, 1997.
 La Vie s’acquit sous un pseudonyme, La Réunion, Grand Océan, 1998.